ကန်ပက်လက် သြဂုတ် ၁၈
စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ကျေးလက်ဒေသဖွံ့ဖြိုးတိုးတက် ရေး ဦးစီးဌာနက ဦးစီးဆောင်ရွက်သည့် ကိုဗစ်-၁၉ ကပ်ရောဂါကာလ စီးပွားရေး ကုစားရေး အစီအစဉ်အရ ကန်ပက်လက် မြို့နယ်တွင် cash for work စီမံကိန်းလုပ်ငန်းကို ကျေးလက်ဒေသ ဖွံ့ဖြိုးတိုးတက်ရေး စီမံကိန်း (DRD) ဖြင့် ဆောင်ရွက်သည့် ကျေးရွာ (၁၀) ရွာ အနောက်ပိုင်းဒေသများ စိုက်ပျိုးစီးပွားဖွံ့ဖြိုး တိုးတက်မှု စီမံကိန်း (WSAP) ဖြင့် ဆောင်ရွက်သည့် ကျေးရွာ (၇) ရွာကို အကောင်အထည်ဖော် ဆောင်ရွက်လျက်ရှိရာ (WSAP) စီမံကိန်းဖြင့် ဆောင်ရွက်သည့် အောက်ကန့်ကျေးရွာအုပ်စု၌ ငါးအော်ကျင်းရွာမှ အောက်ကန့်ရွာ အရှည် (၁) မိုင်၊ အောက်ကန့်ရွာမှ ရှီနှော့ကျင်းရွာ အရှည် (၁) မိုင်၊ ကျေးရွာချင်းဆက် ကုန်ထုတ်လမ်းဖောက်လုပ်မှုမှာ (၅၀) ရာခိုင်နှုန်း ပြီးစီးနေပြီဖြစ်ကြောင်း သိရသည်။
နိုင်ငံတော်အစိုးရက ကိုဗစ်-၁၉ ကပ်ရောဂါကြောင့် ကျေးလက်နေ ပြည်သူများ လူမှု စီးပွား ထိခိုက်မှုများ ကုစားနိုင်ရန်၊ ကျေးရွာများ တွင် အလုပ်အကိုင်ရရှိပြီး ဝင်ငွေရရှိစေရန်၊ ရည်ရွယ်၍ဆောင်ရွက်ပေးခြင်းဖြစ်ပြီး အဆိုပါလုပ်ငန်းပြီးစီးပါက ယင်းကျေးရွာအုပ်စုရှိ အိမ်ထောင်စု (၁၄၂) စုနှင့် ကုန်ထုတ် လုပ်မှုတွင် အကျိုးပြုစိုက်ပျိုးမြေဧက (၂၀၀) ခန့်ရှိရာ အုပ်စုအတွင်း လျှင်မြန်စွာ ဖွံ့ဖြိုး တိုးတက်လာမည်ဖြစ်ကြောင်း သိရသည်။
သန်းမောင်( ပြန် / ဆက်)
ချင်းပြည်နယ်
