မကွေးတိုင်းကျေးလက် စက်တင်ဘာ ၂၅
မကွေးတိုင်းဒေသကြီး ပေါက်မြို့နယ် လူထုဗဟိုပြုစီမံကိန်းဖြင့် အကောင်အထည်ဖော်ဆောင် ရွက်ခဲ့သော ပညာရေး၊ ကျန်းမာရေး လုပ်ငန်းခွဲများအား သက်ဆိုင်ရာဌာနများသို့ လွှဲပြောင်းပေးအပ်ပွဲကို ပေါက်မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန အစည်းအဝေးခန်းမ၌ ယနေ့နံနက် (၉)နာရီအချိန်က ကျင်းပပြုလုပ်သည်။
အဆိုပါ အခမ်းအနားသို့ တိုင်းဒေသကြီး ပြည်သူ့လွှတ်တော်ကိုယ်စားလှယ်၊တိုင်းဒေသကြီး လူထုဗဟိုပြုစီမံကိန်းတာဝန်ခံ၊ မြို့နယ်အထွေထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေး မှူး၊ မြို့နယ်ပညာရေးမှူး၊ မြို့နယ်ကျန်းမာရေးမှူးနှင့်ပေါက်မြို့နယ်လူထုဗဟိုပြုစီမံကိန်းမှ တာဝန်ရှိသူများ၊ ဖိတ်ကြားထားသော ဒေသခံပြည်သူများဌာနဆိုင်ရာများတက်ရောက်ခဲ့ကြ ပြီး တိုင်းဒေသကြီးပြည်သူလွှတ်တော်ကိုယ်စားလှယ်မှ အဖွင့်အမှာစကားပြောကြားကာ တိုင်းဒေသကြီး လူထုဗဟိုပြုစီမံကိန်းတာဝန်ခံမှ ပညာရေး၊ကျန်းမာရေး အဆောက်အဦများ လွှဲပြောင်းပေးရခြင်းရည်ရွယ်ချက်နှင့် ပတ်သက်၍ ရှင်းလင်းပြောကြားခဲ့သည်။ ဆက်လက်၍ ပေါက်မြို့နယ် လူထုဗဟိုပြုစီမံကိန်းပထမနှစ် စက်ဝန်း(၂၀၁၆-၂၀၁၇)ဘဏ္ဍာရေးနှစ်တွင်ဆောင်ရွက်ခဲ့သော ပညာရေးနှင့်သက်ဆိုင်သော အဆောက်အဦ(၈၅)ခုနှင့် ဒုတိယနှစ်စက်ဝန်း(၂၀၁၇-၂၀၁၈) ဘဏ္ဍာရေးနှစ်တွင်ဆောင်ရွက်ခဲ့သော ပညာရေးနှင့်သက်ဆိုင်သော အဆောက်အဦ(၂၈)ခု စုစုပေါင်း အဆောက်အဦ(၁၁၃)ခုနှင့် ပထမနှစ်စက်ဝန်း(၂၀၁၆-၂၀၁၇) ဘဏ္ဍာရေးနှစ်တွင်ဆောင်ရွက်ခဲ့သော ကျန်းမာရေးနှင့်သက်ဆိုင်သည့် အဆောက်အဦ(၅)ခုတို့အား ရေရှည်တည်တံ့ခိုင်မြဲစေရန် သက်ဆိုင်ရာ ဌာနများသို့ စနစ်တကျ လွှဲပြောင်းပေးအပ်ခဲ့ကာ သက်ဆိုင်ရာဌာနများမှ ကျေးဇူးတင်စကားပြောကြားခဲ့ပြီး စုပေါင်း မှတ်တမ်းဓါတ်ပုံရိုက်ကူးကာ အခမ်းအနားအားအောင်မြင်စွာ ပြီးမြောက်ခဲ့ကြောင်းသိရှိရပါသည်။
စိုးမိုး(မကွေး)
