မြန်မာနိုင်ငံ လူထုဗဟိုပြုစီမံကိန်းနှင့်ပတ်သက်ပြီး IFI Watch Myanmar ၏ အစီရင်ခံစာအပေါ် ရှင်းလင်းဖြေကြားခြင်း

မြန်မာနိုင်ငံ လူထုဗဟိုပြုစီမံကိန်းနှင့်ပတ်သက်ပြီး IFI Watch Myanmar ၏ အစီရင်ခံစာအပေါ် ရှင်းလင်းဖြေကြားခြင်း

၁။           IFI Watch Myanmar မှ လူထုဗဟိုပြုစီမံကိန်းအပေါ် သုံးသပ်သည့် အစီရင်ခံစာကို ၂၀၁၆ ခုနှစ် သြဂုတ်လ ၂(၆) ရက်နေ့တွင် ထုတ်ပြန်ခဲ့ပါသည်။ အဆိုပါ အစီရင်ခံစာနှင့်ပတ်သက်၍ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန အနေဖြင့်စီမံကိန်းအပေါ်စဉ်ဆက်မပြတ် သုံးသပ်မှုများကို ကြိုဆိုပါသည်။ သို့သော် အစီရင်ခံစာပါဖော်ပြချက်များနှင့်ပတ်သက်၍ ကျေးလက်ဒေသ ဖွံ့ဖြိုးတိုးတက်ရေးဦးစီးဌာနသို့ ကြိုတင်အကြောင်းကြားခြင်း မရှိခဲ့ပါ၍ သုံးသပ်ချက်ပါ အဓိကကျသည့် ကိစ္စရပ်များကို ပြန်လည်ဖြေရှင်းရန်အတွက် ရည်ရွယ်၍ ရေးသားခြင်းဖြစ်ပါသည်။ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန အနေဖြင့် စီမံကိန်းဆောင်ရွက်ရာတွင် အရပ်ဖက်လူမှုအဖွဲ့အစည်းနှင့် ပူးပေါင်းပြီး တာဝန်ယူမှု တာဝန်ခံမှုအတွက် စဉ်ဆက်မပြတ် ထိတွေ့ဆက်သွယ်ဆောင်ရွက်လျက်ရှိသည့်အတွက် အစီရင်ခံစာပါ မည်သည့်ကိစ္စရပ်များကိုမဆို ပြန်လည်ရှင်းလင်းဖြေကြားပေးရန် အဆင်သင့်ရှိပါသည်။

၂။           ရည်ညွှန်းစာမျကနှာ (၂ နှင့် ၃)၊ စာမျက်နှာ (၆) ပါ လူထုနှင့် ထိတွေ့ဆက်ဆံမှုများတွင် လိုအပ်ချက်များရှိခြင်းနှင့် ပတ်သက်၍ သတင်းအချက်အလက်ပြန်ကြားမှုသည် လူထုဗဟိုပြုစီမံကိန်း၏ အရေးကြီးသည့် ကဏ္ဍတစ်ခုဖြစ်ပြီး စီမံကိန်းအကောင်အထည်ဖော်ဆောင်ရွက်လျက်ရှိသည့် ဒေသခံကျေးလက်လူထုမှ တာဝန်ယူမှု တာဝန်ခံမှုနှင့် စီမံကိန်း၏ လုပ်ငန်းစဉ်များတွင် ပွင့်လင်းမြင်သာမှုရှိစွာဖြင့် တက်ကြွစွာ ပူးပေါင်းပါဝင်ဆောင်ရွက်ရေးသည် အဓိကကျသည့် အစိတ်အပိုင်းတစ်ခု ဖြစ်ပါသည်။ အစီရင်ခံစာပါ ဖော်ပြချက်များသည် မြေပြင်တွင် အကောင်အထည်ဖော်ဆောင်ရွက်နေသည့် အခြေအနေများနှင့် ကိုက်ညီမှု မရှိပါ။ ယခု တတိယနှစ် စီမံကိန်းစက်ဝန်းဖြစ်သည့် (၂၀၁၅-၂၀၁၆) ဘဏ္ဍာရေးနှစ်တွင် စီမံကိန်းမြို့နယ် (၂၇)မြို့နယ်မှ အိမ်ထောင်စု (၆၂%) သည် ကျေးရွာကော်မတီများ ဖွဲ့စည်းခြင်းနှင့် ကျေးရွာစီမံကိန်းများ ရေးဆွဲသည့် အစည်းအဝေးပွဲများတွင် တက်ကြွစွာ ပါဝင်ဆောင်ရွက်လျက်ရှိပါသည်။ စီမံကိန်းစက်ဝန်း တစ်ခုပြီးဆုံးတိုင်း ကျေးရွာအဆင့်တွင် လူထုဆန်းစစ်ပွဲများ ပြုလုပ်ပြီး မြို့နယ်အဆင့်တွင် မြို့နယ်သက်ဆိုင်သူပေါင်းစုံ ပါဝင်သော သုံးသပ်ဆွေးနွေးပွဲအား ကျင်းပပြုလုပ်ခြင်းသည် စီမံကိန်း၏ ရလဒ်နှင့်ပတ်သက်ပြီး ကျေးလက်လူထု (၉၅%) မှ ကျေနပ်အားရမှုရှိသည်ကို ဖော်ညွှန်းပြသလျက်ရှိပါသည်။

၃။           ပြည်ထောင်စုအဆင့် သက်ဆိုင်သူပေါင်းစုံပါဝင်သော သုံးသပ်ဆွေးနွေးပွဲများအား နှစ်စဉ် စီမံကိန်းစက်ဝန်းပြီးဆုံးချိန်တိုင်းတွင် ကျင်းပပြုလုပ်သည့်အပြင် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန နှင့် ကမ္ဘာ့ဘဏ်တို့အနေဖြင့် အရပ်ဖက်လူမှု အဖွဲ့အစည်းများနှင့် တွေ့ဆုံသည့် အစည်းအဝေးများအား တစ်နှစ်လျင် အနည်းဆုံး သုံးကြိမ်ခန့် ကျင်းပပြုလုပ်လျက်ရှိပါသည်။ အဆိုပါ အရပ်ဖက်လူမှု အဖွဲ့အစည်းများနှင့် တွေ့ဆုံသည့် အစည်းအဝေးများနှင့် ပတ်သက်သည့် အနှစ်ချုပ်ကို စီမံကိန်း ဝက်ဘ်ဆိုက်မှ တစ်ဆင့်လည်း ရှာဖွေကြည့်ရှုနိုင်ပါသည်။

၎။             စီမံကိန်း စတင်အကောင်အထည်ဖော်သည့် ပထမနှစ်စက်ဝန်းတွင် သက်ဆိုင်ရာမြို့နယ်များတွင် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန စီမံကိန်းရုံးများအား အစောဆုံးနိုဝင်ဘာလအတွင်းမှာပင် ဖွင့်လှစ်ဆောင်ရွက်နိုင်ခဲ့ခြင်း ဖြစ်ပါသည်။ စီမံကိန်းအကောင်အထည်ဖော်မည့် မြို့နယ်နည်းပညာအကြံပေးအဖွဲ့များကို စာချုပ်ချုပ်ဆို ငှားရမ်းဆောင်ရွက်ရာတွင် ကမ္ဘာ့ဘဏ်၏ ဝယ်ယူရေးလုပ်ငန်းစဉ်များကို လိုက်နာဆောင်ရွက်ရခြင်း အဆိုပါ နည်းပညာအကြံပေးအဖွဲ့များ စာချုပ်ချုပ်ဆိုပြီးချိန်မှ ဒေသခံစည်းရုံးရေးမှူးများ ငှားရမ်းဆောင်ရွက်နိုင်ရေး ဆက်လက်ဆောင်ရွက်ရခြင်းတို့ကြောင့် အချိန်နှောင့်နှေးရခြင်းဖြစ်ပါသည်။ စီမံကိန်းဆောင်ရွက်ရာတွင် ပူးပေါင်းဆောင်ရွက်မှု အားကောင်းသည့် ကျေးရွာလူထု အဖွဲ့အစည်းများတွင် စီမံကိန်းကို ပိုမိုစောလျင်စွာ ဆောင်ရွက်နိုင်သည်ကို တွေ့ရှိရပြီး စီမံကိန်းအကောင်အထည်ဖော်ရာတွင် စီမံကိန်းစက်ဝန်း (၄) ခုဖြင့် ကျေးရွာလူထုအား စဉ်ဆက်မပြတ် စွမ်းဆောင်ရည်မြှင့်တင်နိုင်ရေးကို လုပ်ဆောင်ပေးနိုင်မည်ဖြစ်ပါသည်။

၅        ကျေးလက်ဒေသဖွံ့ဖြိုးတိုးတက်ရေးဦးစီးဌာန အနေဖြင့် စီမံကိန်းမစတင်မီ အရပ်ဖက် အဖွဲ့အစည်းပေါင်းစုံ ပါဝင်၍ စီမံကိန်းမိတ်ဆက်ပွဲများ ပြုလုပ်ပေးခြင်း၊ စီမံကိန်းစတင် အကောင်အထည်ဖော်ချိန်မှစ၍ သတင်းအချက်အလက်ပြန်ကြားဆက်သွယ်ရေးကို အားပေးလှုံ့ဆော်သည့် ပစ္စည်းများဖြစ်သည့် စီမံကိန်းတံဆိပ်ပါ ဦးထုပ်၊ တီရှပ်၊ ဘောလ်ပင်၊ ပိုစတာ၊ လက်ကမ်းစာစောင်များအား လူထုစည်းရုံးရေးမှူးမှတဆင့် ကျေးရွာကော်မတီဝင်များသို့ ဖြန့်ဝေနိုင်ခဲ့ပါသည်။ ထို့အပြင် စီမံကိန်းအကြောင်းအရာအား တို့ရွာနှင့်တို့စီမံကိန်း ဗီဒီယိုဇာတ်လမ်းတွဲအား ကျေးရွာများသို့ ဖြန့်ဝေခြင်းနှင့် မြန်မာ့ရုပ်မြင်သံကြားအစီအစဉ်များတွင်လည်း ထုတ်လွှင့်ပြသလျက်ရှိပါသည်။

၆။       ရည်ညွှန်းစာမျက်နှာ (၁၆) နှင့် စာမျက်နှာ (၁၉) ပါ ပြည့်စုံမှုမရှိသည့် နည်းစနစ်အရည်အသွေး နှင့်ပတ်သက်၍ စီမံကိန်းအကောင်အထည်ဖော်ဆောင်ရွက်သည့် ၂၀၁၃ ခုနှစ်မှ စတင်ပြီး ယခုအချိန်တွင် မြို့နယ်ပေါင်း (၂၇) မြို့နယ်ရှိ ကျေးရွာပေါင်း (၅၄၀၀) ကျော်ကို တိုက်ရိုက်ထောက်ပံ့ငွေ (၄၆.၈) ဘီလီယံကျပ် ထောက်ပံ့ပေးပြီးဖြစ်ပါသည်။ အဆိုပါထောက်ပံ့ငွေများဖြင့် ကျေးလက်အခြေခံ အဆောက်အအုံများဖြစ်သည့် ကျေးလက်လမ်း/တံတား၊ ရေပေးဝေရေး၊ စာသင်ကျောင်း၊ မီးလင်းရေး၊ ကျန်းမာသန့်ရှင်းရေးနှင့် ကျေးလက်ဆေးပေးခန်းအစရှိသည်တို့အား အသစ်တည်ဆောက်ခြင်း၊ အဆင့်မြှင့်တင်ပေးခြင်းတို့ကို ဆောင်ရွက်ပေးနိုင်ခဲ့ပါသည်။ စီမံကိန်းအကောင်အထည်ဖော်ဆောင်ရွက်ရာတွင် လုပ်ငန်းစဉ်များဖြစ်သည့် ကြိုတင်ပြင်ဆင်ခြင်း၊ ဒီဇိုင်းရေးဆွဲခြင်း၊ အကောင်အထည်ဖော်ဆောင်ရွက်ခြင်းနှင့် စောင့်ကြည့်စစ်ဆေးခြင်း စသည်တို့ဖြင့် နည်းစနစ်ကျကျ ဆောင်ရွက်ခဲ့ရာ တတိယအဖွဲ့အစည်း၏ နည်းပညာစစ်ဆေးမှု မှတ်တမ်းအရ စီမံကိန်းလုပ်ငန်းခွဲပေါင်း၏ (၉၂%) သည် ကျေနပ်အားရဖွယ်ရှိသည်ကို တွေ့ရှိရပါသည်။ အဆိုပါ နည်းပညာ စစ်ဆေားခြင်းဆိုင်ရာ အစီရင်ခံစာအား လူထုဗဟိုပြုစီမံကိန်း ဝက်ဘ်ဆိုက်တွင် ရှာဖွေကြည့်ရှုနိုင်ပါသည်။

၇။       ရည်ညွှန်းစာမျက်နှာ (၄)၊ စာမျက်နှာ (၉)၊ စာမျက်နှာ (၁၂)နှင့် စာမျက်နှာ (၁၄) ပါ လူထုစည်းရုံးရေးမှူးများအတွက် ပြည့်စုံမှုမရှိသော သင်တန်းပေးမှုများ နှင့်ပတ်သက်၍ လက်ရှိ စီမံကိန်း အကောင်အထည်ဖော်ဆောင်ရွက်လျက်ရှိသည့် မြို့နယ် (၂၇) မြို့နယ်တွင် လုပ်ကိုင်ဆောင်ရွက်လျက်ရှိသော လူထုစည်းရုံးရေးမှူးပေါင်း (၁၈၀၀)၏ လက်တွေ့မြေပြင် လုပ်ဆောင်မှုများနှင့် စီမံကိန်းဧရိယာ အနည်းငယ်ကို နမူနာစစ်တမ်းကောက်ယူသည့် အစီရင်ခံစာသုံးသပ်မှု အထောက်အထားမှာ ကွဲလွဲလျက်ရှိပါသည်။

၈။       ကျေးရွာလူထု၊ လူထုစည်းရုံးရေးမှူးများနှင့် လက်ထောက်နည်းပညာမှူးများကို စွမ်းဆောင်ရည် မြှင့်တင်ပေးနိုင်ရန်အတွက် စဉ်ဆက်မပြတ် အရည်အသွေးမြှင့် သင်တန်းများ ပို့ချပေးခြင်းသည် လူထုဗဟိုပြုစီမံကိန်း၏ အရည်အသွေးကို မှတ်တမ်းတင်သည့် မှတ်တိုင်ပင် ဖြစ်ပါသည်။ စည်းရုံးရေးမှူးအများစုမှာ သက်ဆိုင်ရာ စီမံကိန်းမြို့နယ်မှ ဒေသခံလူငယ်များဖြစ်ပြီး မိမိဒေသ ဖွံ့ဖြိုးရေးကို ကိုယ်တိုင်ဆောင်ရွက်နိုင်မည့် အလုပ်အကိုင်အခွင့်အလမ်းများ ရရှိစေပြီး တစ်ဆက်တည်းမှာပင် သင်တန်းများတွင် စီမံကိန်းအတွက် အရေးပါသည့် ဒေသဆိုင်ရာ အသိပညာ ဗဟုသုတများကို ထောက်ပံ့ပေးခြင်းပင်ဖြစ်ပါသည်။ ဒေသခံ လူထုစည်းရုံးရေးမှူးများအား ယုံကြည်စွာ အလုပ်အကိုင်အခွင့်အလမ်းပေးခြင်းသည် စီမံကိန်းအောင်မြင်မှုအတွက် လွန်စွာအရေးကြီးသော အဓိကသော့ချက် ဖြစ်ပါသည်။

၉။       ၂၀၁၅ ခုနှစ် ပြည်ထောင်စုအဆင့် သက်ဆိုင်သက်ဆိုင်သူပေါင်းစုံ ပါဝင်သော သုံးသပ်ဆွေးနွေးပွဲမှ အကြံပြုတင်ပြချက်တွင် ပါဝင်သော သင်တန်းနှင့် ပတ်သက်သည့် လိုအပ်ချက်များအား ပြန်လည်သုံးသပ်၍ လူထုစည်းရုံးရေးမှူးများအတွက် ပိုမိုကောင်းမွန်သည့် သင်တန်းအစီအစဉ်များကို ထောက်ပံ့ပေးခဲ့ပါသည်။ အဆိုပါ သင်တန်းအစီအစဉ်များမှာ ပထမနှစ် စီမံကိန်းစက်ဝန်းအတွင်း စီမံကိန်းမြို့နယ်မှ ကျေးလက်ဒေသဖွံ့ဖြိုးတိုးတက်ရေးဦးစီးဌာန ဝန်ထမ်းများနှင့် နည်းပညာအကြံပေးအဖွဲ့များအတွက် လုပ်ငန်းခွင်ဝင်သင်တန်း (၁)ကြိမ်၊ (၇)ရက် စည်းရုံးရေးမှူးများသင်တန်း (၃)ကြိမ်၊ ရက် (၂၀)၊ လက်ထောက်နည်းပညာမှူးများအတွက် အခြေခံအဆောက်အအုံဆိုင်ရာသင်တန်း (၃)ကြိမ်၊ (၁၂)ရက်၊ လူထုစည်းရုံးရေးမှူးများနှင့် လက်ထောက်နည်းပညာမှူးများအတွက် ဆရာဖြစ်သင်တန်း (၃)ကြိမ်၊ သက်ဆိုင်ရာ ဘာသာရပ်အလိုက် သင်တန်း(၁)ကြိမ်နှင့် မွန်းမံသင်တန်း (၁)ကြိမ်စီတို့ ဖြစ်ပါသည်။

၁၀။     အဆိုပါသင်တန်းများကို ပို့ချရာတွင် ပိုမိုထိရောက်စေရန်အတွက် သင်တန်းသင်ရိုးညွှန်းတမ်းများ၊ သင်ထောက်ကူပစ္စည်းများ ပါဝင်သော သင်တန်းဒီဇိုင်းအား ပြန်လည်ရေးဆွဲခြင်းများ ဆောင်ရွက်နိုင်သည့်အပြင် မြို့နယ်ကျေးလက်ဦးစီးဌာနနှင့် နည်းပညာအကြံပေးအဖွဲ့များ ပူးပေါင်း၍ သင်တန်းစီမံကိန်း ဒီဇိုင်းအသစ်န်ှင့် အချိန်ဇယားများကိုလည်း ရေးဆွဲအကောင်အထည်ဖော်နိုင်ခဲ့ပါသည်။ စီမံကိန်းဆောင်ရွက်ရာတွင် ပိုမိုအဆင်ပြေချောမွေ့စေရန် စီမံကိန်းစက်ဝန်း၏ သင့်လျော်သော အဆင့်များတွင် သင်တန်းများ ထောက်ပံ့ပေးရန် ဖြစ်ပါသည်။ လက်ရှိအချိန်တွင် မြို့နယ်အဟောင်းများသာမက မြို့နယ်အသစ်များတွင်လည်း တွေ့ကြုံခဲ့ရသည့် သင်ခန်းစာများကို အခြေပြုပြီး စည်းရုံးရေးမှူး အားလုံးအတွက် အထောက်အကူပြုစေမည့် စဉ်ဆက်မပြတ် သင်တန်းများကို ထောက်ပံ့ပေးလျက်ရှိပါသည်။ စီမံကိန်းသင်တန်းများ စဉ်ဆက်မပြတ် ပို့ချပေးခြင်းဖြင့် မြို့နယ်ရှိဝန်ထမ်းများ၏ စွမ်းဆောင်ရည် အရည်အသွေး တိုးတက်စေသည့်အပြင် စီမံကိန်းလုပ်ဆောင်ရာတွင်လည်း ကြီးကြပ်ရသည့် စည်းရုံးရေးမှူးများအတွက် အထောက်အကူပြုစေရန်လည်း ရည်ရွယ်ပါသည်။

၁၁။     ရည်ညွှန်းစာမျက်နှာ (၁၁)၊ စာမျက်နှာ (၂၁)၊ စာမျက်နှာ (၂၃)နှင့် စာမျက်နှာ (၂၄) ပါ ပွင့်လင်းမြင်သာမှု ကင်းမဲ့ခြင်း နှင့် ပတ်သက်၍ လူထုဗဟိုပြုစီမံကိန်းအား ပွင့်လင်းမြင်သာမှုနှင့် တာဝန်ယူမှု တာဝန်ခံမှု ရှိစေရန် အောက်ခြေအဆင့်မှ ကျယ်ကျယ်ပြန့်ပြန့် ဝေဖန်အကြံပြုနိုင်သည့် ဝေဖန်အကြံပြု တိုင်ကြားချက်ဖြေရှင်းရေး ယန္တရားကို ၂၀၁၃ ခုနှစ် စီမံကိန်း စတင်အကောင်အထည်ဖော် ဆောင်ရွက်ချိန်ကတည်းက လိုက်နာကျင့်သုံးခဲ့ပါသည်။ ယခုအခါ ကျေးလက်ပြည်သူများ စည်းရုံးရေးမှူးများ၊ စီမံကိန်းဝန်ထမ်းများ၊ အုပ်ချုပ်ရေးဝန်ထမ်းများ၊ စီမံကိန်းဆောင်ရွက်သည့် ကန်ထရိုက်တာများ၊ IFI Watch Myanmar အပါအဝင် အရပ်ဖက် လူမှုအဖွဲ့အစည်းများ အစရှိသည့် အဖွဲ့ပေါင်းစုံမှ ဝေဖန်အကြံပြုတိုင်ကြားချက် စုစုပေါင်း (၂၈၉၄) ခုကို ဝေဖန်အကြံပြုတိုင်ကြားချက်ဖြေရှင်းရေး တန္တရားမှ လက်ခံရရှိပြီးဖြစ်ရာ ဇွန်လကုန်အထိ (၈၉%)ခန့်ကို တုန့်ပြန်ဖြေရှင်းခဲ့ပြီးဖြစ်ပါသည်။ ချဉ်းကပ်မှုနည်းလမ်းအသစ်အနေဖြင့် ဝေဖန်အကြံပြုတိုင်ကြားရေး စနစ်များ တိုးတက်လာခြင်းဖြင့် စီမံကိန်းဝန်ထမ်းများ၊ လူထုစည်းရုံးရေးမှူးများနှင့် ကျေးလက်ပြည်သူများ၏ အာရုံနိုင်းကြားနေစေမှုကို စဉ်ဆက်မပြတ် ပံ့ပိုးလျက်ရှိပါသည်။

၁၂။     ဝေဖန်အကြံပြုတိုင်ကြားမှုကို ကျေးရွာများတွင် အကြံပြုစာတိုက်ပုံးများ ထားရှိပေးခြင်းသာမက အခြားနည်းလမ်းများဖြစ်သည့် မြို့နယ် ကျေးလက်ဦးစီး မြို့နယ် နည်းပညာအကြံပေးအဖွဲ့နှင့် ပြည်ထောင်စုအဆင့်အထိ တိုက်ရိုက်လိပ်မူပြီး ဝေဖန်အကြံပြုစာများ ပေးပို့နိုင်ခြင်း၊ ဝေဖန်အကြံပြုတိုင်ကြားချက်များအတွက် သီးသန့်အီးမေးလိပ်စာများ၊ ဖုန်းလိုင်း၊ စီမံကိန်းဝက်ဘ်ဆိုက်နှင့် စီမံကိန်း လူမှုဆက်သွယမှု ကွန်ယက်များတွင် ဝေဖန်အကြံပြုနိုင်သည့်အပြင် လွတ်လပ်ပြီး ပွင့်လင်းမြင်သာမှု ရှိသည့် အခြားနည်းလမ်းများကိုလည်း အသုံးပြုနိုင်ရန် ဖန်တီးပေးထားပြီးဖြစ်ပါသည်။ စီမံကိန်းလမ်းညွှန်ချက် ချိုးဖောက်မှုကဲ့သို့သော တိုင်ကြားမှုများအတွက် ထိရောက်သော စုံစမ်းစစ်ဆေးမှုများကို ပြုလုပ်ပေးလျက်ရှိပါသည်။

၁၃။     ၂၀၁၅ ခုနှစ်တွင် IFI Watch မှ ထုတ်ပြန်ခဲ့သည့် အစီရင်ခံစာပါ စွပ်စွဲဖော်ပြချက်များနှင့် ပတ်သက်ပြီး ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ စုံစမ်းစစ်ဆေးမှုများ ပြုလုပ်ခဲ့ပြီးဖြစ်ပါသည်။ ယင်းနှင့် ပတ်သက်၍ ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ အရေးယူဆောင်ရွက်မှုအသေးစိတ်ကို စီမံကိန်းဝက်ဘ်ဆိုက်လင့်ခ်တွင် ရှာဖွေကြည့်ရှုနိုင်ပါသည်။ ဝေဖန်အကြံပြုချက်အားလုံးကို စာရွက်စာတမ်းများဖြင့် စနစ်တကျလက်ခံထားရှိပြီး ပွင်းလင်းမြင်သာမှုရှိစွာ ဖော်ပြထားရှိပါသည်။ ဝေဖန်အကြံပြုသူ မည်သူမည်ဝါဖြစ်သည်ကို မဖော်ပြဘဲ ဝေဖန်အကြံပြုတိုင်ကြားချက်များကို အများပြည်သူမြင်သာနိုင်စေရန် ဖော်ပြထားပါသည်။

 

ခန့်ဇော်

ညွှန်ကြားရေးမှူးချုပ်

 

 

Download here

Leave a Reply

Your email address will not be published. Required fields are marked *

*

Free WordPress Themes - Download High-quality Templates